الأسئلة الشائعة

هل المنصة مجانية؟

نعم، مجانية بالكامل للمواطنين ولأصحاب الأماكن. ما في اشتراك ولا رسوم للرد أو لإزالة شكوى.

هل يعرف صاحب المكان مين اشتكى؟

لا. ما منطلب اسمك، وما منشارك معلومات التواصل مع أي حدا، ومنحذف الموقع الجغرافي من الصور والفيديو تلقائياً. انتبه بس أنو ما تكتب تفاصيل بتدل عليك بالوصف.

قديش بتاخد المراجعة؟

نراجع الشكاوى بالترتيب. الشكوى اللي فيها دليل واضح ومكان محدد بتمر أسرع. تابع الحالة من الرابط الخاص اللي بيوصلك بعد الإرسال.

ضيّعت الرابط الخاص، شو أعمل؟

افتح صفحة «تابع شكواك» واكتب رقم الشكوى والرمز السري المكوّن من 6 أرقام اللي ظهروا لك بعد الإرسال. إذا ضيّعتهم كمان، ما في طريقة لاسترجاعهم لأننا ما منعرف مين أنت، لهيك اكتبهم على ورقة أو خذ لقطة شاشة.

ليش لازم الوصف يكون 100 حرف على الأقل؟

الوصف القصير متل «المطعم وسخ» ما بيكفي للتحقق. منحتاج نعرف شو شفت بالضبط وإيمتى، حتى نقدر نطابقه مع الدليل ونعطي صاحب المكان فرصة يصلّح المشكلة الصحيحة.

ما عندي صورة، فيني اشتكي؟

فيك ترسل، بس الشكوى بلا دليل نادراً ما تنقبل للنشر. إذا المشكلة مستمرة، ارجع صوّرها وأرسل شكوى جديدة.

ليش انرفضت شكواي؟

سبب الرفض بيظهر بصفحتك الخاصة. الأسباب الشائعة: لا دليل، مكان غير محدد، اتهام أشخاص بأسمائهم، محتوى سياسي أو طائفي، أو شكوى مكررة.

أنا صاحب المكان وانذكر محلي، شو أعمل؟

ادخل صفحة «لأصحاب الأماكن»، دوّر على اسم محلك، واكتب ردك. إذا أصلحت المشكلة أرفق صور الإصلاح. بعد المراجعة بينشر ردك جنب الشكوى، وبتتحول لقصة نجاح إلك.

مين بيقرر إنو المشكلة انحلّت؟

مو صاحب المكان لحاله. الشكوى بتنعلّم كمحلولة بتأكيد المبلّغ نفسه، أو جهة رسمية، أو فريقنا بعد مهلة للمبلّغ ليعترض. ودائماً منعرض أي طريقة.

شو بيصير بالشكوى بعد ما تنحل؟

بتضل منشورة كقصة نجاح مع صور قبل وبعد. بعد 6 أشهر منخفي صور المشكلة الأصلية وبتختفي من محركات البحث والقوائم، وبتضل قصة الإصلاح. وإذا رجعت المشكلة قبل هالمدة، المبلّغ بيقدر يعيد فتحها من رابطه الخاص أو برقم الشكوى والرمز السري، وعندها بتضل الشكوى ظاهرة بالكامل لمدة سنتين بعد حلّها، لأن صحة وسلامة إخوتنا وأخواتنا أمانة عنا ومنتعامل معها بجدية كبيرة.

هل أنتم جهة حكومية؟

لا. شكوى963 مشروع مستقل غير تابع لأي جهة. ومع ذلك، منحثّ البلديات ومديريات الصحة والتموين وكل الجهات الرسمية على متابعة الشكاوى المنشورة والاستفادة منها، ومنرحّب بأي تعاون أو شراكة تخدم الناس وتسرّع إصلاح المشاكل. للتواصل راسلونا على تيليغرام عبر @ShakwaSyBot. وإذا أكّدت جهة رسمية إصلاحاً، منذكر اسمها.

فيني ارسل أكتر من شكوى؟

أكيد، بس عن مشاكل مختلفة. في حد يومي لعدد الشكاوى من نفس الجهاز لمنع الإساءة، والشكوى المكررة عن نفس المكان بترفض تلقائياً.